Skipafloti félagsins

Nýju ísfiskskipin þrjú, Akurey, Engey og Viðey, voru öll í fullum rekstri framan af ári. Í júní var Engey seld og afhent nýjum eigendum í Rússlandi. Almennt hefur rekstur þeirra gengið vel og skip og búnaður virkað vel. Ánægja er með skipin og allur aðbúnaður starfsmanna til fyrirmyndar. Þá hefur sýnt sig að nýbreytni í hönnun lestar og millidekks er að skila auknu vinnuhagræði, fækkun slysa og bættri meðferð afla.

Helgu Maríu var lagt á fyrri hluta ársins. Skipið var síðan leigt í hafrannsóknarverkefni á vegum grænlensku landsstjórnarinnar í tæpa þrjá mánuði um sumarið. Hér var um áhugavert verkefni að ræða sem gekk vel og lýstu leigutakar yfir mikilli ánægju með útkomuna. Þegar því verkefni lauk kom skipið inn í rekstur félagsins á ný til að fylla skarð Engeyjar.

Eftir kaupin á Ögurvík ehf., í lok árs 2018, kom frystitogarinn Vigri inn í rekstur félagsins strax í byrjun árs og voru þá þrír frystitogarar í rekstri félagsins allt árið.

Mikil vinna hefur verið í tengslum við smíði nýs frystitogara félagsins, bæði hér heima og á Spáni. Skipið er það stærsta sem íslenskt útgerðarfélag hefur ráðist í að smíða og er það afar tæknivætt og vel búið. Nokkur töf hefur orðið á afhendingu skipsins en stefnt er að afhendingu í vor.

Engin loðnuvertíð var á árinu og hafði það mikil áhrif á rekstur uppsjávarskipanna. Rekstur þeirra gekk annars vel og eru bæði skipin að skila því sem lagt var upp með í byrjun. Þessi öflugu skip gera félaginu kleift að sækja á fjarlæg mið á mun öruggari hátt en áður.